ეკა ბესელიამ „პოლიტიკის ფორმულის“ ეთერში იმ მოსამართლეებზე ისაუბრა, რომლებიც ყოფილი და მოქმედი ხელისუფლების პირობებში სახელისუფლებო დაკვეთებს ასრულებდნენ. ბესელიას თქმით, ესენი არიან ადამიანები, რომლებიც ემსახურებოდნენ წინა ხელისუფლებასაც და ახლანდელის სიმპათიებსაც იმიტომ იმსახურებენ, რომ „ქართული ოცნების“ დავალებებსაც უსიტყვოდ შეასრულებენ.

„აქ არის თამარ ალანია, ცნობილი გვანცა ყუფარაძის მოსამართლე, მუხროვანის ე.წ. ამბოხის მოსამართლე; აქ არის პაატა სილაგაძე, რომელმაც არასრულწლოვანი, სკოლის მოსწავლე გაუშვა ციხეში, სრულიად უდანაშაულო და ეს იყო უპრეცედენტო გადაწყვეტილება; აქ არიან მოსამართლეები, რომლებსაც არა მხოლოდ პოლიტიკური გადაწყვეტილებები გამოჰქონდათ, არამედ გამამართლებელი განაჩენი არ ჰქონდათ გამოტანილი. აქ არის მოსამართლე მიქაუტაძე, იუსტიციის საბჭოს მდივანი, რომელიც, დარწმუნებული ვარ, იმ სიაშია, ვინც უნდა გაიყვანონ. ეს არის ადამიანი, რომელიც თავის დროზე „ქართული ოცნების“ კოალიციაში მყოფი პირების დაჯარიმებით და გაკოტრებით იყო დაკავებული. აქ არის მოსამართლე, რომელმაც ივანიშვილს მოქალაქეობის ჩამორთმევა დაუკანონა. ეს პოლიტიკური დავალებების მქონე მოსამართლეები, რომლებზეც კობახიძემ თქვა, ცუდ საქმეებს აკეთებდნენ და ახლა კარგ საქმეებს აკეთებენო, იმიტომ მოსწონთ, რომ მათ დავალებებსაც უსიტყვოდ შეასრულებენ“, - განაცხადა ეკა ბესელიამ.

შეგახსენებთ, 20-კაციანი სიის კენჭისყრა პარლამენტში 14 დეკემბერსაა ჩანიშნული.