თბილისის ახალი ზოოპარკის მშენებლობა და ცხოველების გადაყვანა ეტაპობრივად მიმდინარეობს.

როგორც თბილისის ზოოპარკის საზოგადოებასთან ურთიერთობის ხელმძღვანელი მზია შარაშენიძე  აცხადებს, თბილისის ახალ ზოოპარკში გადაიყვანეს დათვები, მგლები, ირმები, ნეამორები, დასავლეთ და აღმოსავლეთ კავკასიური ჯიხვები, ფოცხვერები, აფრიკული მოხატული ძაღლები. ცოტა ხნის წინ ჩამოიყვანეს დომბა. ყველა ამ სახეობას კი ახალი, კეთილმოწყობილი ვოლიერი აქვს.

„ახალ ზოოპარკში სამუშაოები მიმდინარეობს. ჩვენი ფინანსებით ხდება ეს ყველაფერი და არ გვაქვს იმის საშუალება, რომ რამდენიმე ვოლიერი ერთად ავაშენოთ“, - ამბობს მზია შარაშენიძე.

მისი ინფორმაციით, ამ ეტაპზე თბილისის ზოოპარკში მტაცებელი ფრინველების ავიარიუმის მშენებლობა მიმდინარეობს.

„იქნება დიდი და ლამაზი ვოლიერი. ამ ვოლიერის მშენებლობა რომ დასრულდება, შევძლებთ ვიფიქროთ კავკასიის ექსპოზიციის ნაწილის გახსნაზე. მთლიანად ზოოპარკის დასრულებას დიდი ხანი დასჭირდება. ჩვენ ეტაპობრივად ვაშენებთ, შესაბამისად ასევე ეტაპობრივად გავხსნით მას. ანუ, გავხსნით რაღაც ნაწილს და ნელ-ნელა, მშენებლობის პარალელურად დაემატება სხვადასხვა ნაწილები“, - აღნიშნა მზია შარაშენიძემ.

მისი თქმით, ავიარიუმის მშენებლობის დასრულების შემდეგ, თბილისის ზოოპარკში გაიხსნება კავკასიის ექსპოზიციის ნაწილი.

„ეს იქნება ადგილი, სადაც წარმოდგენილი იქნებიან საქართველოში გავრცელებული სახეობები. ჩვენი ზოოპარკი ამ მხრივ იქნება განსაკუთრებული, რადგან მსოფლიოში არ არსებობს კონკრეტულად კავკასიის ექსპოზიცია. ავიარიუმის მშენებლობის დასრულების შემდეგ, გახსნამდე გარკვეული ინფრასტრუქტურის მოწესრიგება იქნება საჭირო - სავალი ბილიკები, საპირფარეშოები და ა.შ. ამ ყველაფრის დასრულების შემდეგ კი შეგვეძლება ვთქვათ კონკრეტული თარიღი, როდის შევძლებთ ამ პირველი ექსპოზიციის გახსნას“, - აცხადებს მზია შარაშენიძე.

წყარო: pia.ge