ძალიან მაღალი თანამდებობის პირები აშშ-ში თუ ისევ იმ გზავნილებით მიდიან, რომ თქვენ რაღაც, კარგად, ვერ გაერკვიეთ და მოდით ახლა, ჩვენ გაგარკვევთ, მაშინ მე მეშინია იმის, რომ ეს მხოლოდ ხელისუფლებას აღარ აზიანებს, ეს ქვეყანას აზიანებს, - ამის შესახებ პარლამენტის დამოუკიდებელმა დეპუტატმა თამარ ჩუგოშვილმა „პალიტრანიუსის“ გადაცემაში „360 გრადუსი“ განაცხადა.

ჩუგოშვილის თქმით, სენატორებისა და კონგრესმენების მიერ საქართველოს ხელისუფლებისადმი გამოგზავნილ წერილებზე მმართველი პარტიის წარმომადგენელთა განცხადება „უარესს შვრება“.

„ეს განცხადებები, რომ მათ (ამერიკელებმა) არ იციან, სიტუაციაში ვერ გაერკვნენ, ახლა ჩავალთ და გავარკვევთ, უარესს შვრება, იმიტომ, რომ ძალიან კარგად იციან რაზე ლაპარაკობენ. ძალიან კარგად იციან მეგობრობის ჯგუფის წევრებმა, საგარეო კომიტეტის თავმჯდომარეებმა, უმაღლესი რანგის კონგრესმენებმა. რაზე ლაპარაკობენ და მაინც ლაპარაკობენ ამ ყველაფერს არა იმიტომ, რომ ინფორმაცია არ აქვთ, არამედ, იმიტომ, რომ გულდაწყვეტილები, განაწყენებულები არიან იმაზე, როგორც მოექცა საქართველოს ხელისუფლება მათ და როგორც მოიქცა ამ სიტუაციაში.

ზოგჯერ ისეთ განცხადებებს ვკითხულობ, რომ „ჩვენ სუვერენული ქვეყანა ვართ და საერთოდ რა ჭკუას გვასწავლიან". სტრატეგიული პარტნიორი გეუბნება, რომ ტყუილებს ნუ იტყვი, არჩევნებში ცუდად ნუ მოიქცევი და შენს ხალხს მიეცი იმის უფლება, რომ ნება გამოხატოს, მერე ეს სამართლიანად ასახე შედეგებში, ცუდს და სუვერენიტეტში ჩამრევს რას გეუბნება?! არ ვიცი, ასეთი განცხადებები სრულიად მიუღებელია.

მე მინდა იმედი ვიქონიო, რომ ეს დელეგაცია, როდესაც ჩავა აშშ-ში ეტყვის იმას, რომ გავიაროთ ეს ეტაპი, დავბრუნდეთ, ჩვენც რაღაც ნაბიჯებს გადავდგამთ საარჩევნო სისტემასთან დაკავშირებით, რაღაცებს შევცვლით. მე იმედი მაქვს, რომ ამის სათქმელად ჩავა. მხოლოდ სიტყვა საკმარისი არ იქნება, ეს მერე უნდა გააკეთონ კიდევაც იმიტომ, რომ თუ ისევ იმ გზავნილებით მიდიან, ძალიან მაღალი თანამდებობის პირები, რომ თქვენ რაღაც, კარგად, ვერ გაერკვიეთ და მოდით ახლა, ჩვენ გაგარკვევთ, მაშინ მე მეშინია იმის, რომ ეს მხოლოდ ხელისუფლებას აღარ აზიანებს. ეს ქვეყანას აზიანებს. ჩვენ ყველა ვზიანდებით ამ პროცესით. მხოლოდ "ოცნება" და ხელისუფლება არ ზიანდება, ყველა ვზიანდებით იმიტომ, რომ წლები და უზარმაზარი რესურსია ჩადებული იმაში, რომ საქრთველოზე ყოფილიყო მხოლოდ კარგი წარმოდგენა, საქართველო სცოდნოდათ, როგორც სანიმუშო სამაგალითო ქვეყანა, პარტნიორი, რომელიც წინ მიდის, მილიონ სირთულეს უმკლავდება და მათაც სურვილი ჰქონოდათ, რომ ამ კარგი პარტნიორის მხარდაჭერა გაეგრძელებინათ. ამას, რომ ვანგრევთ, მე არ ვიცი ეს თავიდან, როგორ უნდა ავაშენოთ“, - განაცხადა თამარ ჩუგოშვილმა.