რუსეთის პრეზიდენტის ადმინისტრაციაში ადამიანებს სიცხეს უზომავენ. ამის შესახებ Meduza რუსულ მედიაზე დაყრდნობით წერს.

გამოცემის ინფორმაციით, სამედიცინო შემოწმებას იმ საჯარო ღონისძიებების მონაწილეები გადიან, რომლებსაც ვლადიმერ პუტინი ესწრება.

მოგვიანებით პუტინის პრეს-მდინვანმა დმიტრი პესკოვმა განმარტა, რომ კრემლში პრევენციული ზომები კორონავირუსის გავრცელების საწინააღმდეგოდ არის მიმართული.

ბოლო მონაცემებით, ფატალურმა ვირუსმა ჩინეთში 563 ადამიანი იმსხვერპლა. ჩინეთის ეროვნული ჯანდაცვის კომისიის მონაცემებით, ქვეყანაში კორონავირუსის 3 694 ახალი შემთხვევა დადასტურდა, ჯამში კი ინფიცირებულთა რაოდენობამ 28 ათასს გადააჭარბა. ჩინეთის ფარგლებს გარეთ კორონავირუსი უკვე 27 ქვეყანაშია დაფიქსირებული.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს. საქართველოში ვირუსის გავრცელების შანსი მინიმალურია.

რა არის კორონავირუსი და რა რეკომენდაციებს აძლევს მოგზაურებს ამასთან დაკავშირებით დაავადებათა კონტროლის ცენტრი, იხილეთ მითითებულ ბმულებზე.