ყველაზე ნაკლები რისკის ქვეშ არიან 6-დან 24-წლამდე ასაკის ადამიანები, თითქმის არ არიან, მათ შესაძლოა ვირუსი დაემართოთ, მაგრამ გადააქვთ ადვილად, - ამის შესახებ იმუნოლოგმა, დავით ნანობაშვილმა ტელეკომპანია „პირველის“ ეთერში განაცხადა.

მისი თქმით, 6 წლამდე ასაკის ბავშვები მეტი რისკის ქვეშ არიან, რადგან მათ შემთხვევაში სხვა დამამძიმებელი ფაქტორებიც მუშაობს.

„ეს არის ნაწლავური ინფექციები, მათ შორის პარაზიტული ინფექციები, რაც სამწუხაროდ ხშირია საბავშვო ბაღის ასაკის ბავშვებში. რადგანაც ჭიების არსებობის დროს იმუნური სისტემის მკვეთრი დაქვეითება ხდება, ამიტომაც 6 წლამდე ასაკის ბავშვები ცოტა მეტი რისკის ქვეშ არიან“, - განაცხადა დავით ნანობაშვილმა.

საქართველოში კორონავირუსის პირველი შემთხვევა დადასტურდა. ჯანდაცვის მინისტრის, ეკატერინე ტიკარაძის თქმით, დაავადებული საქართველოს მოქალაქეა, რომელიც გუშინ აზერბაიჯანის გავლით ირანიდან შემოვიდა. საუბარია 50 წლის კაცზე. პაციენტი ინფექციურ საავადმყოფოშია გადაყვანილი და მის სიცოცხლეს საფრთხე არ ემუქრება.

26 თებერვალს ჯანმომ განაცხადა, რომ კორონავირუსის პანდემიად გამოცხადების საფუძველი ჯერ არ არსებობს.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.