სლოვაკეთის პრეზიდენტი ზუზანა ჩაპუტოვა თვითიზოლაციაშია. ამის შესახებ BBC წერს.

სლოვაკეთის პრეზიდენტის სპიკერის ინფორმაციით, პრეზიდენტის ერთ-ერთ თანამშრომელს COVID-19-ით ინფიცირებულ პირთან ჰქონდა კონტაქტი.

თვითიზოლაციის გამო, ზუზანა ჩაპუტოვამ ჩეხეთის რესპუბლიკის სენატის თავმჯდომარესთან და ავსტრიის პრეზიდენტთან დაგეგმილი შეხვედრები გააუქმა.

გამოცემის ცნობით, სლოვაკეთი ერთ-ერთი პირველი ქვეყანა იყო ევროპაში, რომელმაც საზღვრები ჩაკეტა და პირბადეების ტარება სავალდებულო გახადა.

სლოვაკეთში კოვიდინფექცია 1 607 ადამიანს დაუდასტურდა. მათ შორის 28 დაიღუპა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.