ფსიქოლოგი ნათია ფანჯიკიძე „ნამახვანჰესის“ აქციასა და ქვეყნის დამოუკიდებლობის დღის შესახებ სოციალურ ქსელში წერს.
„ჩვენი ქვეყნის 30-ე დაბადებისდღე დგება ხვალ, ხუმრობა ხომ არაა, მრგვალი თარიღი გვაქვს, მიუხედავად იმისა, რომ, როგორც ჩემი ფრენდბრილიანტი ნათი იტყოდა, ასაკი სულ არ გვეტყობა. ხოდა, „აი ჰევ ე დრიმო“, მარტინ ლუთერ კინგმა რომ თქვა, მეც მაქვს ოცნება, კრავი და მგელი ერთად ძოვდეს ამ ქვეყანაში.იმედი მაქვს, ვარლამ გოლეთიანს ეყოფა ალღოც და უპირველესად, სიყვარული, თითოეული ადამიანის მხარდაჭერა თანაბარმნიშვნელოვნად იგრძნოს და დააფასოს. თამარ მეფის კოსტუმში თუ შორტებში, ბუმბულებით თუ ხანჯლებით, როგორც არ უნდა გამოვიყურებოდეთ და ვისაც თავის თავზე უფრო შერეკილი სხვა არ უნდა ეჩვენებოდეს, სინამდვილეში, ყველა ერთად ვართ „ჩვენ“ და ამიტომაც ვართ ნაირნაირები და საინტერესოები.

მკაცრად უნდა გაესვას ხაზი, ვინც თავს დაესხმება სხვას, აგრესორი და პროვოკატორია და არ არსებობს მიზეზი, რომლითაც აგრესია გამართლდება. არც ჰესების გამეგება რამე და არც ბევრი რამის კიდევ, მაგრამ ამაში დარწმუნებული ვარ, რომ ჯგუფებად დაქუცმაცებას წერტილი ერთხელ და სამუდამოდ უნდა დაესვას. ბედნიერი და ჩუხჩუხა დაბადების დღე საქართველოს“, – წერს ფანჯიკიძე.

შეგახსენებთ, ვარლამ გოლეთიანმა საზოგადოებას მოუწოდა, რომ „26 მაისს არ უნდა მივიდნენ აღლუმზე, არამედ უნდა მივიდნენ მათთან“.

ცნობისთვის, ნამახვანჰესის მოწინააღმდეგეებსა და ხელისუფლებას შორის უშედეგო მოლაპარაკებების შემდეგ პროტესტის დედაქალაქში გადმოტანის გადაწყვეტილება მიიღეს. მთავრობამ მათ ჰესის მშენებლობაზე ერთი წლის განმავლობაში მორატორიუმი შესთავაზა, თუმცა აქციის მონაწილეების თქმით, მოსამზადებელ სამუშაოები არ გაჩერებულა.