აშშ მსოფლიოს ღარიბ ქვეყნებს Pfizer-ის 500 მილიონ დოზას გადასცემს. ინფორმაციას ამის შესახებ თეთრი სახლი ავრცელებს.

„500 მილიონი ვაქცინა, რომლებიც სიცოცხლეებს გადაარჩენს, 2022 წლის ივნისამდე იქნება მიწოდებული, მათგან 200 მილიონი - 2021 წლის ბოლომდე“, - აცხადებენ აშშ-ის პრეზიდენტის ადმინისტრაციაში.

ვაქცინებს დაბალი და საშუალოზე დაბალი შემოსავლების მქონე 92 ქვეყანა მიიღებს.

„ეს არის ერთი ქვეყნის მხრიდან ვაქცინების ყველაზე დიდი ჩუქება, რაც ადასტურებს ამერიკელი ხალხის სურვილს, დაეხმაროს მსოფლიოს მოსახლეობას კოვიდისგან დაცვაში“, - აღნიშნულია განცხადებაში.

ამჟამად აშშ-ში ვაქცინის პირველი დოზა ზრდასრული მოსახლეობის 64%-ს აქვს გაკეთებული, დღიური გარდაცვალების მაჩვენებელი კი პანდემიის დაწყების შემდეგ მინიმუმამდე დაეცა.