ამერიკულმა ავიაციამ სირიასა და ერაყში პროირანულ დაჯგუფებებზე ავიაიერიში განახორციელა. ამის შესახებ Reuters იუწყება.

იერიში ამერიკულ ბაზებზე ამ დაჯგუფებების მხრიდან უპილოტო საფრენი აპარატებით განხორციელებული შეტევის საპასუხოდ ჩატარდა. ავიაიერიშის ჩატარების ბრძანება აშშ-ის პრეზიდენტმა ჯო ბაიდენმა გასცა.

ავიადარტყმა F-15 და F-16 თვითმფრინავებმა განახორციელეს. შეტევა იმ დროს მოხდა, როდესაც აშშ და ირანი ბირთვული პროგრამის გარშემო შეთანხმების აღდგენას ცდილობენ. ჯო ბაიდენის კრიტიკოსები აცხადებენ, რომ ამერიკულ ბაზებზე ირანელების მიერ განხორციელებული თავდასხმები კიდევ ერთხელ მიუთითებს, რომ თეირანის ნდობა არ შეიძლება.

ამერიკულ ავიაიერიშებს უკვე გამოეხმაურა ირანის წარმომადგენელი. ირანის საგარეო საქმეთა სამინისტროს ოფიციალურმა წარმომადგენელმა საიდ ხათიბზადემ განაცხადა, რომ „შეერთებული შტატების ქმედება რეგიონში უსაფრთხოებას ემუქრება“.