„მარტო ის გახსოვთ ხაშურის ბორდელებს როგორ ვარბევდი, არადა რაც მე გორის ჰოსპიტლის მშენებლობაზე საჩხერის ქვიშის მტვერი მაქვს ნასუნთქი“ - ასე გამოეხმაურა „გამარჯვებული საქართველოს“ ლიდერი ირაკლი ოქრუაშვილი მესამე პრეზიდენტის მიხეილ სააკაშვილის გორის ჰოსპიტალში გადაყვანის საკითხს. „ინდე გორელებო, თუ არ გამოგადგათ ჩემი აშენებული ჰოსპიტალი. „რად გვინდა გოსპიტალი და სამხედრო ბაზები ჩვენაო, ბაზარი და სტალინის ძეგლი გვინდაო“ რომ მეუბნებოდით. ძლივს დაუბრუნა ჰოსპიტალმა ქალაქს სიცოცხლე და პოლიტიკური მნიშვნელობა.

დაიწყება ახლა ჰოსპიტლის შესასვლელთან ჟურნალისტების ჩართვები ადგილობრივებიან „ალჯაზირა-სიენებებიანათ“, მოაწყდება ქალაქს ათასი შპიონი, ნასედკა თუ ფორმიანი, ოჯახებიანად თუ არა თანაშემწეებიანად კვირაში ორჯერ მაინც გესტუმრებიან „თალკომდინხუები“ (თალაკვაძე, კობახიძე, მდინარაძე, ხუნდაძეები), მაგათ დაუმატეთ ექიმები, ექსპერტები, საელჩოები, ნაცები, კაი ბიჭები, რუსების აგენტურა და მრავალი სხვა.

გადაივსება რესტორნები და მაღაზიები, ბაზარში მოიმატებს მუშტარი და გაყიდული პროდუქტი. ხაზარაძეც ერთ-ორ ვალუტნი ბუტკას ჩადგამს იქვე ჰოსპიტლის შესასვლელთან. მიშა იქიდანაც ისეთ ქარბორბალას დაატრიალებს, რომ ბათუმის, თბილისის, ზუგდიდის და დანარჩენი სამყაროს ყურადღება სულ გორისკენ იქნება.

ქალაქში დროდადრო ცირკის დათვივით ხინჩეგაანთ ლადოს და ტრუსიკმაიკიან და ბოქსის ფელჩატკებიან კანდელაკს ჩამოატარებთ ხოლმე და ექსკურსიაზე ჩამოსული ბავშვების რიგები დადგება. ყველაფერს რომ თავი დავანებოთ, შურით გასკდებიან კასპელები და ხაშურელები.

ინდე თუ არ გამოგადგათ ჰოსპიტალი, მარტო ის რომ გახსოვთ ჩემი, ხაშურის ბორდელებს როგორ ვარბევდი. არადა რაც მე მაგ ჰოსპიტლის მშენებლობაზე კასპის ცემენტის და საჩხერის ქვიშის მტვერი მაქვს ნასუნთქი“, - წერს ირაკლი ოქრუაშვილი.