მოძრაობა „სირცხვილიას“ აქტივისტი გიგა მაქარაშვილი სოციალურ ქსელში წერს, რომ ემიგრანტების დახმარებით, ქუჩაში მცხოვრები 5 მოხუცი ერთ-ერთი ემიგრანტის დაკეტილ სახლში დააბინავეს.

როგორც მაქარაშვილი წერს, მოხუცებს მოუწესრიგეს საბუთები და ხუთივე მათგანი პენსიას და სოციალურ დახმარებას აიღებს.

„3 თვე ვემზადებოდით ამ დღისთვის და ყველაზე ნამდვილი ზეიმიც შედგა!

ბევრი ძებნის და გამოკითხვის შემდეგ 5 მოხუცი ავიყვანეთ პირდაპირ ქუჩიდან, მოვაწესრიგეთ, ექიმები დავახვიეთ, ჩავაცვით, წამლები და საკვები ვუყიდეთ და სად დავაბინავეთ იცით?

სახლში, ჰო, სახლში! ერთი კეთილი ემიგრანტის გამოკეტილ სახლში

სახლში, რომელიც აგერ უკვე 20 წელია დაკეტილი იყო!

ჩავრთეთ გაზიც, ელექტრო ენერგიაც, წყალიც, ახალი თეთრეული დავაგეთ ლოგინებზე, მაცივარიც საკვებით შევავსეთ და მეზობელ სტუდენტ (სამედიცინოს მეოთხე კურსელი) გოგონასაც გადავუხადეთ თანხა, რომ მოხუცების ჯანმრთელობა აკონტროლოს.

სულ მცირე ძალისხმევით მოვუწესრიგეთ საბუთები და ხუთივე აიღებს პენსიასაც და სოციალურ დახმარებასაც!

სანამ მოყოჩაღდებიან, კიდევ ერთი მეზობელი დავასაქმეთ და მას მოხუცების საკვებით მომარაგება და კომუნალურების გადახდა დაევალა (ამ ყველფერს კიდევ ერთი ემიგრანტი ოჯახი აფინანსებს)!

ამბავი კი ერთი კეთილი ემიგრანტის სურვილით დაიწყო, რომელსაც უკიდურესად გაჭირვებული ადამიანების დახმარება სურდა

ძველით ახალ წელს, უკვე ფერზე მოსულ, გამოცოცხლებულ ოჯახში მიგიყვანთ სტუმრად და 75 წლის ასაკში თავიდან დაბადებულ ადამიანებს გაგაცნობთ

ამ წამს კიდევ ერთი დაკეტილი სახლი გამოჩნდა…

იქნებ შემოვატრიალით ეს სიძულვილით გატენილი რეალობა?

სულ ცოტა მონდომებაა საჭირო და ყველაფერი გამოვა!

ბედობას გილოცავთ!

ჩემო კარგო ქვეყანავ“, – წერს გიგა მაქარაშვილი.