ბულგარეთში კოვიდვაქცინაციის მოწინააღმდეგეებმა პარლამენტში შეჭრა სცადეს, რასაც პოლიციასთან დაპირისპირება მოჰყვა. ამის შესახებ ინფორმაციას CNN ავრცელებს.
დაძაბულობა ერთი საათის შემდეგ, შეხლა-შემოხლაში გადაიზარდა.

მომიტინგეებმა მოუწოდეს დეპუტატებს, გასულიყვნენ გარეთ და მათი მოთხოვნების დაკმაყოფილების შესახებ განეცხადებინათ. ხანმოკლე შეტაკების დროს რამდენიმე ადამიანი დაშავდა, მათ შორის პოლიციელები.

დაახლოებით 3000-მა ადამიანმა კოვიდსაშვების გაუქმება მოითხოვა, რომელიც მათი თქმით, ლახავს ადამიანის უფლებებს და ხალხს ვაქცინაციას აიძულებს.

აქციაზე შეკრებილი ადამიანები სკანდირებდნენ სიტყვებს „თავისუფლება“ და „მაფია“. ისინი აკრიტიკებენ ყველა შეზღუდვას, რომელიც კორონავირუსის გავრცელების გამო მოქმედებს და მათ გაუქმებას ითხოვენ.