პეკინის ზამთრის XXIV ოლიმპიური თამაშების მეთოთხმეტე საშეჯიბრო დღეს საქმეში ჩაერთნენ საქართველოს ოლიმპიური გუნდის ბოლო წარმომადგენლები, - ამის შესახებ ინფორმაციას საქართველოს ეროვნული ოლიმპიური კომიტეტი ავრცელებს.

მათივე ინფორმაციით, ფიგურული ციგურაობის სპორტულ წყვილებში კარინა საფინასა და ლუკა ბერულავას წყვილმა მათთვის სადებიუტო თამაშებზე პირველი გამოცდა მოკლე პროგრამაში წარმატებით ჩააბარეს-მსაჯებისგან 66.11-ქულიანი შეფასება მიიღეს და 18 მონაწილეს შორის (ერთი წყვილი კორონავირუსის გამო ასპარეზობას გამოეთიშა) მეცხრე შედეგი აჩვენეს.

„მოციგურავეებმა კარგად გაართვეს თავი რთულ ელემენტებს, სინქრონული და ეფექტური სრიალითაც გამოირჩნენ.

თავისუფალ პროგრამაში გასასვლელად, რომელიც 19 თებერვალს მედალოსნებს გამოავლენს, საუკეთესო 16-ში გასვლა იყო საჭირო. ასე რომ, კარინა საფინასა და ლუკა ბერულავას წყვილი ხვალ თავისუფალ პროგრამაში იასპარეზებს და იმედი გვაქვს, რომ სატურნირო ცხრილში დაწინაურებას მოახერხებს“, - ნათქვამია საქართველოს ეროვნული ოლიმპიური კომიტეტის მიერ გავრცელებულ ინფორმაიაში.