ნორვეგიის სამეფოს ჯანდაცვის სამინისტროს უფროსი მრჩეველმა ზაზა წერეთელმა „პირველი არხის“ ეთერში, „ომიკრონის“ და ხანგრძლივი კოვიდის შესახებ ისაუბრა და აღნიშნა რომ საქართველომ „ომიკრონს“ გავრცელების ფართო ასპარეზი მისცა. როგორც წერეთელი აღნიშნავს, საქართველოში ვაქცინაციის მაჩვენებელი ძალიან დაბალია და ეს შტამების გავრცელებას ხელს უწყობს.

„საქართველოში ვაქცინაცია უნდა ყოფილიყო ძალიან აქტიური. შეზღუდვები, რომლებიც იყო, არ კონტროლდებოდა და არც ადამიანები იცავდნენ წესებს. მწვანე პასპორტის შემოღება დაგვიანებული იყო და დავინახეთ, რომ ვერც იმუშავა.

გავრცელებული მითი, რომ „ომიკრონი“ მარტივად მიმდინარეობს, უნდა აღინიშნოს, რომ მსუბუქად მიმდინარეობს იმ ქვეყნებში, სადაც მოსახლეობის 90% აცრილია. „ომიკრონს“ შეუძლია, გართულდეს და გამოიწვიოს სიკვდილიანობა.

იმის გამო, რომ საქართველოში დაბალი ვაქცინაცია იყო, ჩვენ ფართო ასპარეზი მივეცით არა მარტო „ომიკრონს“, არამედ ყველა სხვა შტამს, რომ გავრცელებულიყო და ადამიანები დაინფიცირებულიყვნენ. შეიძლება, ვიღაც ფიქრობს და იძახის, რომ დაინფიცირებით შეიძენს იმუნიტეტს, მაგრამ კვლევებმა აჩვენა, რომ თუ აცრილი არ ხართ, „ომიკრონის“ მიერ ჩამოყალიბებული იმუნიტეტი ძალიან სუსტია და საერთოდ არც მუშაობს.

მეორე, შეიძლება, ის გაგირთულდეს და ხანგრძლივი კოვიდი დაგრჩეს. ამიტომ, გარისკვა, რომ არ ავიცრები და იმუნიტეტს დაავადების გადატანით ჩამოვიყალიბებ, არ შეიძლება. თუ თქვენ აცრილი არ ხართ და გადაიტანეთ „ომიკრონი“, არც ერთი სხვა შტამის მიმართ იმუნიტეტი არ ვრცელდება და მეორე ქვეტიპის მიმართაც კი არ აქვს იმუნიტეტი. ის ვინც აცრილია და გადაიტანა „ომიკრონი“, მათი იმუნიტეტი ძლიერია და რეინფიცირების შანსი, რომ ის ქვეტიპით დაინფიცირდეს, არის ძალიან დაბალი, იმ ადამიანებთან შედარებით, რომლებიც არ არიან აცრილნი“, - განაცხადა ზაზა წერეთელმა.

ნორვეგიის სამეფოს ჯანდაცვის სამინისტროს უფროსი მრჩეველმა ზაზა წერეთელმა, ხანგრძლივი კოვიდის შესახებაც ისაუბრა.

მისი თქმით, ხანგრძლივი კოვიდი შეიძლება, დიდი პრობლემა გახდეს.

„ხანგრძლივ კოვიდზე ძალიან ბევრი ქვეყანა მუშაობს. ფინეთმა უკვე აღიარა, რომ ხანგრძლივი კოვიდი შეიძლება, ქრონიკული დაავადების ერთ-ერთი სახეობა გახდეს და დიდი პრობლემა იყოსო. ამიტომ, ყველა ქვეყანა უკვე ახლავე ემზადება და გარკვეული სარეაბილიტაციო ჰოსპიტლებიც კი იქმნება, რათა იმკურნალონ იმ ადამიანებმა, რომლებსაც ხანგრძლივი კოვიდის სიმპტომები აქვთ.

ხანგრძლივი კოვიდი ტოვებს გართულებებს. შეიძლება, ეს იყოს გულ-სისხლძარღვთა სისტემაში, ნერვულ სისტემაში, მაგალითად, მუდმივი გადაღლილობა, სტრესული მდგომარეობა, მეხსიერების პრობლემები, ტვინის დაბინდვა. დაახლოებით 6 თვის განმავლობაში მათი შრომის უნარიანობა კლებულობს. კვლევებმა აჩვენა, რომ ვაქცინირებულებში ხანგრძლივი კოვიდი უფრო ნაკლებად და მცირე დროის განმავლობაში მიმდინარეობს. ეს არის ძალიან უცნაური ვირუსი და არავინ ვიცით მომავალ წელს რა შეიძლება, მოხდეს იმის გამო, რომ გადავიტანეთ ესა თუ ის დაავადება“, - აღნიშნავს ნორვეგიის სამეფოს ჯანდაცვის სამინისტროს უფროსი მრჩეველი.

ზაზა წერეთლის თქმით, „ომიკრონი“ პანდემიას არ დაასრულებს.

„მსოფლიოში ძალიან ბევრი ქვეყანა ჯერ კიდევ აუცრელია, რაც ტოვებს შანსს, რომ შეიძლება, ახალი შტამი გამოჩნდეს. თქმა იმისა, რომ ჩვენ დასასრულისკენ მივდივართ, ალბათ ძალიან ძნელია. თუ ახალი შტამი არ გამოჩნდა, ეს ნიშნავს იმას, რომ პანდემია გადავიდეს ენდემურ მდგომარეობაში. ჩვენ ძველებურ ცხოვრებას ვერ დავუბრუნდებით. ენდემური ნიშნავს იმას, რომ ეს ვირუსი იქნება და იცირკულირებს. ენდემურობა საქართველოსთვის შეიძლება, კარგი იყოს მაგრამ ენდემურობისთვისაც მზად უნდა იყოს ქვეყანა“, - დასძენს ზაზა წერეთელი.