პარლამენტის ვიცე-სპიკერის, არჩილ თალაკვაძის განცხადებით, დღეს პარლამენტში განვითარებული მოვლენები „ნაციონალური მოძრაობისა“ და რადიკალური ოპოზიციის პოლიტიკური შოუ იყო და დესტაბილიზაციის მოწყობას ისახავდა მიზნად.

საკანონმდებლო ორგანოში დღეს განვითარებულ მოვლენებს არჩილ თალაკვაძე ტელეკომპანია „პალიტრანიუსის“ გადაცემა „დღის ნიუსრუმში“ გამოეხმაურა.

თალაკვაძის თქმით, „ნაციონალურმა მოძრაობამ“ დღეს იმოქმედა როგორც დესტრუქციულმა ძალამ, ხოლო მმართველმა გუნდმა - როგორც პასუხისმგებლიანმა ხელისუფლებამ“.

„რაც დღეს პარლამენტში ვნახეთ, „ნაციონალური მოძრაობისა“ და რადიკალური ოპოზიციის პოლიტიკური შოუ იყო, რომელსაც არაფერი აქვს საერთო საქართველოს და უკრაინის ინტერესებთან. ეს ემსახურებოდა ერთადერთს - ახლა, როდესაც ერთიანობა გვჭირდება, როდესაც საერთაშორისო საზოგადოებასთან უკრაინასთან დაკავშირებით თანამშრომლობა და კომუნიკაცია გვჭირდება, ასევე, რა თქმა უნდა, შიდა პოლიტიკური სტაბილურობა, „ნაციონალურმა მოძრაობამ“ და რადიკალურმა ოპოზიციამ ეს შოუ დაგეგმა იმისთვის, რომ როგორმე ქვეყნის შიგნით პოლიტიკური დესტაბილიზაცია მოაწყონ; პროვოკაციების ფონზე შექმნან ისეთი ვითარება, რომელშიც რაღაც პოლიტიკურ დივიდენდებსა და გამორჩენას ხედავენ. სინამდვილეში რადიკალური ოპოზიციის მიზანი და ამოცანა არის ერთადერთი, რომ მოახდინონ შიდა პოლიტიკური ვითარების დესტაბილიზაცია და ამ ფონზე სცადონ ძალაუფლების მიღება, რომელსაც არჩევნებით ვერ მიაღწიეს“, - განაცხადა არჩილ თალაკვაძემ.

კითხვაზე, რატომ არ გამოიყენა მმართველმა გუნდმა პარლამენტის რეგლამენტით გათვალისწინებული შესაძლებლობა და რატომ არ დახურა რიგგარეშე პლენარული სხდომა, თუკი „პოლიტიკური შოუს“ ეჭვი ჰქონდა, თალაკვაძე ამბობს, რომ როდესაც უკრაინაში ომი მიმდინარეობს, „ნაციონალურ მოძრაობასთან“ ამ ტიპის გარჩევაში შესვლა არ სურთ.

„რაც შეეხება რეგლამენტს, ახლა, როდესაც უკრაინაში ომი მიმდინარეობს, არ გვსურს ამ ტიპის გარჩევაში შესვლა, თან ვისთან? – „ნაციონალურ მოძრაობასთან“, ძალასთან, რომელიც იჩემებს, რომ როდესაც მსოფლიო ლიდერები ფიქრობენ, რისი გაკეთება შეუძლიათ აგრესიის შესაკავებლად, მან იცის, როგორც გადაჭრას ეს საკითხი. იჩემებს, რომ საქართველოს შეუძლია ამ პრობლემების მოგვარება იმ რიტორიკითა და ქმედებებით, რაც საზოგადოებას აჩვენეს. კომიკურად გამოიყურება, ვინ გვასწავლის ამ ყველაფერს - გვასწავლის ის ხალხი, რომელიც იყო ხელისუფლებაში და რომლის ხელმძღვანელობის დროს დავკარგეთ კოდორი, ახალგორი“, - განაცხადა თალაკვაძემ.

მისივე თქმით, პარლამენტის სხდომათა დარბაზში დღეს უკრაინის ჰიმნის მოსმენა სურდათ ადამიანებს, რომლებმაც ამავე დარბაზში საბჭოთა კავშირის ჰიმნი ორჯერ ჩართეს.

„ეს ადამიანები დღეს გამოვიდნენ და საჯაროდ აცხადებდნენ, რომ უნდოდათ პარლამენტის დარბაზში შესვლა, უკრაინის ჰიმნი უნდა ჩავრთოთ და მოვისმინოთ დარბაზშიო. მათ ჰგონიათ, რომ ხალხს მეხსიერება არ აქვს. მათ ჩვენი საზოგადოება გაუნათლებელი ჰგონიათ. ამას გვეუბნება პოლიტიკური ძალა, რომელმაც საქართველოს პარლამენტის დარბაზში იკადრა ის, რაც არცერთ პოლიტიკურ ძალას არ უკადრია - საბჭოთა კავშირის ჰიმნი ჩართეს ორჯერ. გამოდიოდნენ და მათი აზრით ჭკვიანური და გულწრფელი სახეებით საუბრობდნენ“, - განაცხადა არჩილ თალაკვაძემ.

რაც შეეხება პრემიერ-მინისტრის განცხადებას, რომ პარლამენტში მისვლას არ აპირებს, თალაკვაძის თქმით, მისთვის მიუღებელია, „პარლამენტში პრემიერ-მინისტრის მისვლა-არმისვლაზე ლაპარაკობდეს ძალა, რომლის დროსაც პარლამენტი იყო ნოტარიუსი“.

როგორც თალაკვაძემ აღნიშნა, „ქართული ოცნების“ ხელისუფლების პირობებში, ბოლო ორ წელიწადში პრემიერ-მინისტრი და მინისტრები იმაზე მეტჯერ იმყოფებოდნენ საკანონმდებლო ორგანოში, ვიდრე ჯამში ბოლო 20 წლის განმავლობაში.

„პარლამენტში პრემიერ-მინისტრის მისვლა-არმისვლაზე ვინ გველაპარაკება? - ძალა, რომლის დროსაც პარლამენტი იყო ნოტარიუსი. ბოლო 20 წლის განმავლობაში რაც პრემიერები და პრეზიდენტები ყოფილან პარლამენტში, მათ შორის, მთელი „ნაციონალური მოძრაობის“ მუშაობის პერიოდში, მხოლოდ ამ ბოლო ორ წელიწადში, „ქართული ოცნების“ მმართველობის პერიოდში ჯამურად იმაზე მეტჯერ იყვნენ პრემიერ-მინისტრები პარლამენტში. ბოლო ორ წელიწადში რამდენჯერაც პრემიერ-მინისტრები და მინისტრები მოვიდნენ პარლამენტში, ეს ჯამურად აღემატება ბოლო ოცი წლის განმავლობაში მოსვლას. ხმის ამოღებას და კითხვის დასმას ვერ ბედავდნენ, საერთოდ; სახალხო დამცველის ანგარიშებს ისმენდნენ შუაღამით, სამი დეპუტატი“, - განაცხადა თალაკვაძემ.

ცნობისთვის, დღეს პარლამენტის პლენარული სესიის რიგგარეშე სხდომა, სადაც უკრაინის საკითხი უნდა განეხილათ, არ ჩატარდა. „ქართულმა ოცნებამ“ სხდომაზე დასწრებაზე უარი განაცხადა. ოპოზიციონერ დეპუტატებს კი პლენარულ სხდომათა დარბაზის კარები დაკეტილი დახვდათ. შესაბამისად, მათ დარბაზში შესვლა და რეგისტრაციის პროცედურის გავლაც ვერ შეძლეს. ოპოზიციის წარმომადგენლებმა უკრაინის ჰიმნი სხდომათა დარბაზის წინ, დერეფანში გააჟღერეს. რიგგარეშე პლენარული სხდომის დღის წესრიგი უკრაინასთან დაკავშირებული საკითხის განხილვას, მათ შორის პარლამენტში პრემიერ-მინისტრის მისვლას ითვალისწინებდა.