25 თებერვალს, რუსული რადიოსადგურის „ეხო მოსკვი“-ს მიერ გავრცელებული ინფორმაცია, თურქეთის მხრიდან რუსი სამხედროებისთვის ბოსფორისა და დარდანელის სრუტეების დაკეტვაზე, სიმართლეს არ შეესაბამება. ამის შესახებ ინფორმაციას CNN თურქულ მედიაზე დაყრდნობით ავრცელებს. თურქეთს არ შეუძლია შეაჩეროს სამხედრო გემების გავლა შავ ზღვაში მიმავალი სრუტეებით, როგორც ამას უკრაინა ითხოვდა, ამის შესახებ თურქეთის საგარეო საქმეთა მინისტრმა მევლუთ ჩავუშოღლუმ თურქულ გაზეთ Hurriyet-ს განუცხადა. მისი მითითებით მონტრეს კონვენციის პუნქტი გემებს თავიანთ ბაზაზე დაბრუნების საშუალებას აძლევს.

„ომის შემთხვევაში, სადაც თურქეთი არ არის მხარე, არის ზომები, რომლებიც შეიძლება იქნეს მიღებული იმ ქვეყნებთან დაკავშირებით, რომლებიც ომის მონაწილეები არიან.

თუ არსებობს მოთხოვნა, რომ მეომარი ქვეყნების გემები დაბრუნდნენ თავიანთ ბაზებზე, მაშინ ეს უნდა იყოს დაშვებული“, - განაცხადა მევლუთ ჩავუშოღლუმ.

შეგახსენებთ, რომ უკრაინამ თურქეთს თხოვნით მიმართა, რათა დაებლოკა რუსული ხომალდების დარდანელისა და ბოსფორის სრუტეებში გავლა. ჩავუშოღლუმ განაცხადა, რომ თურქეთს ამის შესაძლებლობა შეზღუდული აქვს.

ინფორმაციისთვის, 1936 წელს ხელმოწერილი მონტრეს კონვენცია ამ ორ ძირითად სრუტეზე გემების გავლაზე თურქეთს აძლევს კონტროლს. მშვიდობიან პერიოდში სამოქალაქო გემებს შეუძლიათ თავისუფლად გადაადგილება, თუმცა არსებობს გარკვეული შეზღუდვები იმ გემების გადაადგილებაზე, რომლებიც არ მიეკუთვნებიან შავი ზღვის ქვეყნებს.