ჩეჩნეთის ხელმძღვანელმა რამზან კადიროვმა ვოლოდიმირ ზელენსკის ძალაუფლების ვიქტორ იანუკოვიჩისთვის გადაცემა შესთავაზა. ინფორმაციას „რია ნოვოსტი“ ავრცელებს.„მე თქვენ არ მოგმართავთ, როგორც პრეზიდენტს. კანონის თანახმად, ვიქტორ იანუკოვიჩი რჩება უკრაინის პრეზიდენტად. აი, სწორედ მას, ლეგიტიმურ პრეზიდენტს გადააბარეთ ძალაუფლება და ბედს მიენდეთ, იქნებ ნაწილობრივ მაინც გქონდეთ დანაშაულების გამოსყიდვის შანსი“, - წერს კადიროვი ზელენსკიზე.

გარდა ამისა, მან აღნიშნა, რომ „ზელენსკი უკრაინიდან ისე გაიქცა, რომ მისი ფეხის ხმა ვერავინ გაიგო“.

მისი თქმით, ახლა უკრაინის პრეზიდენტის ადმინისტრაცია დაბნეულია და რადას დეპუტატები გაურკვევლობაში არიან.

„ვლადიმერ, დაბრუნდით! სად წავიდა თქვენი პატრიოტიზმი, სისწრაფე, მხურვალე გამოსვლები? მე კი თავიდანვე ვიცოდი, რომ გაიქცეოდით, მაგრამ თქვენი ხალხის წინაშე შეგეძლოთ სახე შეგენარჩუნებინათ, თუნდაც საკმაოდ ცუდ თამაშში, თუმცა, როგორც მსახიობი განსაკუთრებული ნიჭით არ გამოირჩევით“, - წერს კადიროვი.

კადიროვმა, აგრეთვე, დასძინა, რომ ზელენსკის ჯერ კიდევ აქვს დრო კიევში დასაბრუნებლად „თუკი რუსეთის მოთხოვნებს დათანხმდება და ლუგანსკისა და დონეცკის მოსახლეობას ბოდიშს მოუხდის. ასევე, მოუბოდიშებს მთელ უკრაინას იმ უსამართლობისთვის, რაც იქ ბოლო წლებში ხდებოდა“.