უკრაინის შს მინისტრის მრჩევლის ვადიმ დენისენკოს განცხადებით, რუსულ მხარეს სურს მოაწყოს ე.წ ჰუმანიტარული დერეფნები რუსეთსა და ბელარუსში, რათა უკრაინელები ტყვედ აიყვანოს.
„გუშინ რუსებმა კიდევ ერთხელ განაცხადეს, რომ დღეს გეგმავენ ჰუმანიტარული დერეფნების უზრუნველყოფას. მინდა მჯეროდეს, რომ ეს წარმატებით განხორციელდება, მაგრამ, სამწუხაროდ, როგორც ჩანს, რუსეთის ფედერაციამ თავის სამხედროებს დაავალა, არ დაუშვან ჰუმანიტარული დერეფნები უკრაინაში“, - განაცხადა დენისენკომ.
მისი თქმით, ასეთი ჰუმანიტარული დერეფნები საჭიროა ოკუპირებული ტერიტორიებიდან მშვიდობიანი მოსახლეობის ევაკუაციისთვის, კერძოდ, მარიუპოლიდან, ხარკოვიდან, იზიუმიდან, ტროსტიანეციდან, ბუჩადან და გოსტომელიდან. დენისენკო აღნიშნავს, რომ რუსებს სურთ, უკრაინელებმა მათ ჰუმანიტარული დერეფნები სთხოვონ.
„რუსები გეგმავენ ჰუმანიტარული დერეფნის გაკეთებას რუსეთის ფედერაციასა და ბელორუსიაში. გვთავაზობენ - გამოგიყვანთ და გახდებით ჩვენი სატელევიზიო სურათის ტყვეები და მსხვერპლი, სადაც უნდა მოყვეთ, როგორ გიმძიმთ უკრაინის მმართველობის პირობებში და რა კარგია აქ, რუსეთის ფედერაციაში“, - აღნიშნა მან.
დენისენკოს თქმით, ოკუპირებულ ტერიტორიებზე სახლების ყველა ეზოში რუსული ტექნიკა დგას.
"ისინი ისე დგანან, რომ ჩვენ ვერ მოვახერხოთ მათი გამოგდება ამ ტერიტორიებიდან, რადგან მათ ესმით, რომ ჩვენ არ ვესვრით სამოქალაქო ობიექტებს, ადამიანებს. ისინი იმალებიან ადამიანების უკან, იყენებენ მათ , როგორც ცოცხალ ფარს", - აღნიშნა დენისენკომ.