ნორმალურ პირობებში ელჩი შესაძლოა ფიზიკურად წასულიყო, ამ ვითარებაში, როცა უკრაინაში ომია, საერთოდ არაფერ შუაშია ფიზიკურად გასვლა ქვეყნიდან და უკრაინაში დაბრუნება, ეს დიპლომატიურ ენაში არ ცვლის იმას, რაც მოხდა, - ამის შესახებ „ ევროპული საქართველოს“ თავმჯდომარე, გიგა ბოკერიამ განაცხადა.

მისი თქმით, დიპლომატიურ ენაზე ელჩის გაწვევა არის პროტესტი.

„ელჩის გაწვევა ფიზიკურ წასვლას კი არ გულისხმობს აუცილებლად, ეს არის დიპლომატიური ჟესტი, ახლა უკრაინაში ომია, შესაძლებელია, სხვა შემთხვევაში ელჩის გაწვევისას ის ფიზიკურად წასულიყო, მაგრამ ეს არ არის აუცილებელი. ელჩის გაწვევა დიპლომატიურ ენაზე არის პროტესტი, რომ რასაც აკეთებ, ჩვენი ურთიერთობიდან იმდენად დიდი გადახვევა არის, დროებით ელჩს ვთიშავ დიპლომატიური პროცესებიდან. ნორმალურ პირობებში ელჩი შესაძლოა, ფიზიკურად წასულიყო, ამ ვითარებაში, როცა უკრაინაში ომია, საერთოდ არაფერ შუაშია ფიზიკურად გასვლა ქვეყნიდან და უკრაინაში დაბრუნება, ეს არ ცვლის დიპლომატიურ ენაში იმას, რაც მოხდა“, - განაცხადა ბოკერიამ.

ცნობისთვის, უკრაინის დროებითი რწმუნებული საქართველოში ანდრეი კასიანოვი აცხადებს, რომ საქართველოში უკრაინის ელჩის დაბრუნების შესახებ საგარეო საქმეთა სამინისტროს დაუყოვნებლივ ეცნობება. ამასთან, როგორც მან განმარტა, კონსულტაციები შეიძლება სხვადასხვა ფორმატში ჩატარდეს.