"ნიკა მელიას თხოვნით მივედით პარტიაში, სადაც უნდა გაგვერკვია ჩვენს მეგობართან მიმართებაში გავრცელებული უბინძურესი ამბის შესახებ. იქ მისულებს დაგვახვედრეს ხალხი და მოხდა ფიზიკური დაპირისპირება, სადაც ნიკა მელია მოუწოდებდა თავის ხელქვეითებს, რომ ჩვენ დავეხოცეთ. ეს ფაქტი არსებობს", - ამის შესახებ „ნაციონალური მოძრაობის“ თავმჯდომარეობის კანდიდატმა, გიორგი მუმლაძემ განაცხადა.

„რაც შეეხება ჩანაწერს, როგორც შინაარსი, ისევე ფორმა ასეთი ბრძოლის ჩემთვის არის მიუღებელი და ბინძური. პირადად რაც მომისმენია ნიკა მელიასგან, ეს იყო მიხეილ სააკაშვილის საჯაროდ დაკნინება. ნიკა მელია საჯაროდ ამბობდა, რომ მიხეილ სააკაშვილი არ არის ფაქტორი და არის „no go man“ - ანუ საერთაშორისო პარტნიორებისთვის მიუღებელი. ეს არის კატასტროფა“, - აცხადებს მუმლაძე.

სოციალურ ქსელში გავრცელდა ჩანაწერი, სადაც სავარაუდოდ, „ნაციონალური მოძრაობის“ თავმჯდომარე ნიკა მელია, სავარაუდოდ ყოფილ პრეზიდენტზე, მიხეილ სააკაშვილზე უცენზურო სიტყვებით საუბრობს. გამოქვეყნებულ ვიდეოზე მითითებულია, რომ საუბარი ჩაწერილია 2021 წლის არჩევნებამდე.