აქცია ყოველდღე მოიმატებს რაოდენობაშიც და ხარისხშიც. ბოლოს და ბოლოს ავიღებთ და ერთ მშვენიერ დღეს „ქართულ ოცნებასაც“ გადავაყირავებთ. აქციის მიზანია მიშა სააკაშვილის თავისუფლება. უნდა მიეცეს ჩვენს მესამე პრეზიდენტს საშუალება, რომ შეინარჩუნოს სიცოცხლე, ჯანმრთელობა, – ამის შესახებ „ნაციონალური მოძრაობის“ წევრმა, დევი ჭანკოტაძემ განაცხადა.

ჭანკოტაძის თქმით, აქციები გაგრძელდება.

„მომავალში შეიძლება, უფრო მძიმე გადაწყვეტილება მივიღოთ და დავტოვოთ მანდატები, მაგრამ ჩვენ ახლა გვაინტერესებს მუშაობის შეწყვეტა. დავაკვირდებით მოსახლეობის, უცხოელი პარტნიორების რეაქციას და შესაბამის გადაწყვეტილებას მივიღებთ. დამიჯერეთ, არცერთი ჩვენი დეპუტატი კომფორტულად ამ პარლამენტში თავს ვერ გრძნობს. პარტია მიიღებს ყველაზე სწორ გადაწყვეტილებას და ახლა თუ ვიღაც-ვიღაც დეპუტატებს აქვთ სურვილი, რომ გამოვიდნენ პარტიიდან, მაგალითად, ვნახეთ ქალბატონი ნონა მამულაშვილი გამოვიდა, ეს იყო მისი გადაწყვეტილება. პირადად მე, როგორც დეპუტატი დავემორჩილები, პირველ რიგში, რა თქმა უნდა, ბატონ მიხეილ სააკაშვილის, ჩვენი პარტიის თავმჯდომარის და ხელმძღვანელობის გადაწყვეტილებას, ამის შემდეგ მივიღებ გადაწყვეტილებას. მარტო მე თვითონ ვერ მივიღებ. თუმცა, არ გამოვრიცხავ, რომ ზოგიერთმა დეპუტატმა მიიღოს ეს გადაწყვეტილება“, – განაცხადა ჭანკოტაძემ.