ამ კანონპროექტის მიღების საჭიროება არ არსებობს. აქ არის ერთადერთი ამოცანა, რომ ამ რუსული ნაბიჯით დაარტყან და განადგურება დაიწყონ არასამთავრობო სექტორის და მეორე - ყველაფერი გააკეთონ იმისთვის, რომ არ მივიღოთ ევროკავშირის წევრობისთვის კანდიდატის სტატუსი, - ასე აფასებს თავდაცვის ყოფილი მინისტრი დავით სიხარულიძე „ხალხის ძალის“ კანონპროექტს „უცხოური გავლენის გამჭვირვალობის შესახებ“.

როგორც მან „პალიტრანიუსის“ გადაცემაში „დღის ნიუსრუმი“ განაცხადა, გასულ წელს, იმ დროს როდესაც ქვეყანას სტატუსი უნდა მიეღო, დააკავეს „მთავარი არხის“ დირექტორი ნიკა გვარამია და „ყველაფერი იყო გაკეთებული იმისთვის, რომ სტატუსი არ მიგვეღო“. სიხარულიძის განმარტებით, ახლაც მცდელობაა იმის, რომ საქართველომ სტატუსი არ მიიღოს, „რათა ქვეყანაში გაგრძელდეს ოლიგარქიული მმართველობა, ძარცვა და რუსული გავლენები“.

მისივე თქმით, „ხალხის ძალის“ კანონპროექტით საქართველოში აპირებენ იმგვარი კანონის მიღებას, რომელიც რუსეთმა უკვე წლების წინ მიიღო. როგორც სიხარულიძემ აღნიშნა, ამ კანონპროექტს ამერიკულ კანონთან საერთო არ აქვს, ის ანტიდასავლურია, რასაც რამდენიმე ინდიკატორი განსაზღვრავს.

„ამის მიღების საჭიროება არ არსებობს, იმიტომ, რომ საქართველოში არ არსებობს მეტნაკლებად საკუთარი თავის პატივისმცემელი არასამთავრობო ორგანიზაცია, რომელსაც თავის ვებ-გვერდზე არ უწერია, თუ ვისგან აქვს გრანტი მიღებული. ასევე არ არის არცერთი საკუთარი თავის პატივისმცემელი დონორი, რომელსაც არ უწერია, თუ ვის აძლევს ფულს. პრობლემატური არის სწორედ ეს მთავრობის მიერ ორგანიზებული ფსევდო არასამთავრობო ორგანიზაციები, რომლებიც მთავრობისგან ამა თუ იმ სქემებით იღებენ ფულს.

საბჭოთა კავშირის დროს იყო წლები, როდესაც სიტყვა „აგენტის“ გამო ზოგჯერ ხან ხვრეტდნენ, ხან ციხეში აგზავნიდნენ. ზოგადად ამ სიტყვას, ნეგატიური კონვერტაცია მოჰყვება, „გაშავებას" ემსახურება. ეს არის ძირის გამოთხრის მცდელობა დამოუკიდებელი არასამთავრობო ორგანიზაციებისთვის, რომლებიც მუშაობენ და ებრძვიან კორუფციულ სქემებს. ასევე, არსებობენ არასამთავრობოები, რომლებიც ადამიანებს, ვისაც საშუალება არ აქვთ, მათთვის ადვოკატებს ქირაობენ, ეხმარებიან იმათ, ვისაც სამსახურიდან უკანონოდ აგდებენ და ა.შ. ეს არ მოსწონთ და ამის განადგურებისკენაა მიმართული, მაგრამ ამ ფორმით, ასეთი ხეპრე განცხადებები, სადაც ხაზგასმულად ხეპრე ტონია არჩეული, ვფიქრობ, კეთდება სწორედ იმის გამო, რომ ხელახლა მიმდინარეობს საუბარი დასავლეთში, მოგცენ თუ არა ჩვენ სტატუსი და იქნება თუ არა საქართველოს წინსვლა ევროკავშირისკენ“, - განაცხადა დავით სიხარულიძემ.

მისი თქმით, ბიძინა ივანიშვილის პარტიები ყველაფერს ცდილობენ იმისათვის, რომ საქართველომ არ მიიღოს ევროკავშირის წევრობისთვის კანდიდატის სტატუსი.