ინფორმაცია, თითქოს „თბილსერვის ჯგუფის“ დასუფთავების სამსახურის თანამშრომელი სამსახურიდან გაათავისუფლეს, რადგან აქციაზე იმყოფებოდა, არის ტყუილი - თბილისის მერია
„გვინდა, გამოვეხმაუროთ ერთ-ერთი მედიასაშუალებით გავრცელებულ ინფორმაციას, თითქოს „თბილსერვის ჯგუფის“ დასუფთავების სამსახურის თანამშრომელი, ვინმე გიორგი მუხიგულაშვილი, სამსახურიდან გაათავისუფლეს იმის გამო, რომ „გამჭვირვალობის კანონის“ საპროტესტო აქციაზე იმყოფებოდა“, - ამის შესახებ განცხადებას თბილისის მერია ავრცელებს.
„სრული პასუხისმგებლობით ვაცხადებთ, რომ აღნიშნული პიროვნება არ არის და არც ყოფილა „თბილსერვის ჯგუფის“ თანამშრომელი, შესაბამისად, ვერ მოხდებოდა მისი სამსახურიდან გათავისუფლება.
გავრცელებული ინფორმაცია არის სრული ტყუილი და მიზნად ისახავს საზოგადოების დეზინფორმირებას.
მოვუწოდებთ მედიის წარმომადგენლებს, პატივი სცენ საკუთარ მაყურებელს და თბილისის მუნიციპალიტეტთან დაკავშირებული ნებისმიერი ინფორმაცია გადაამოწმონ თბილისის მერიის პრესსამსახურში“, - ვკითხულობთ განცხადებაში.
