უკრაინის შეიარაღებულმა ძალებმა მოიგერიეს რუსი დამპყრობლების 19 თავდასხმა ბახმუტის მიმართულებით, კერძოდ, ჩასივ-იარში, - ამის შესახებ უკრაინის შეიარაღებული ძალების გენერალური შტაბი იუწყება.

უკრაინის შეიარაღებული ძალების გენერალური შტაბის თანახმად, ბოლო 24 საათის განმავლობაში 68 საბრძოლო შეტაკება მოხდა. ოკუპანტმა ორი სარაკეტო და 64 საჰაერო დარტყმა განახორციელა.

გენშტაბის ცნობით, გასული დღის განმავლობაში ავიადარტყმები განხორციელდა სუმის, ხარკოვის, ლუგანსკის, დონეცკის, ზაპოროჟიესა და ხერსონის რეგიონებში 30 დასახლებულ პუნქტში. ამ რეგიონების 110-ზე მეტი დასახლება, ასევე ჩერნიგოვის, დნეპროპეტროვსკის და მიკოლაივის რეგიონები საარტილერიო ცეცხლის ქვეშ მოექცა. 

ამავე ცნობით, კუპიანსკის მიმართულებით, დამპყრობელმა არ ჩაატარა შეტევითი მოქმედებები, მაგრამ ლიმანის რეგიონში მან ცხრაჯერ შეუტია უკრაინის დამცველების პოზიციებს.

„ბახმუტის მიმართულებით უკრაინელმა ჯარისკაცებმა მოიგერიეს 19 თავდასხმა დონეცკის ოლქის დასახლებებში, სადაც ოკუპანტი ავიაციის მხარდაჭერით ცდილობდა ტაქტიკური პოზიციის გაუმჯობესებას“, - ნათქვამია მოხსენებაში.

გენშტაბის ცნობით, ავდეევკის მიმართულებით უკრაინელმა ჯარისკაცებმა მოიგერიეს 11 თავდასხმა დონეცკის ოლქის დასახლებებში.

„ნოვოპავლოვსკის მიმართულებით თავდაცვის ძალები აგრძელებენ მოწინააღმდეგის შეკავებას დონეცკის ოლქის კრასნოგოროვკასა და ნოვომიხაილოვკას დასახლებებში, სადაც დამპყრობელმა 20-ჯერ სცადა უკრაინული ჯარების თავდაცვის გარღვევა“, - აღნიშნავს გენერალური შტაბი.

გარდა ამისა, ორეხოვოს მიმართულებით, ოკუპანტმა ოთხჯერ შეუტია უკრაინელი დამცველების პოზიციებს დონეცკის ოლქის რაიონებში.

„ხერსონის მიმართულებით მოწინააღმდეგე არ თმობს განზრახვას დაარტყას უკრაინულ შენაერთებს დნეპრის მარცხენა სანაპიროზე. ამრიგად, გასული დღის განმავლობაში ოკუპანტმა განახორციელა ხუთი წარუმატებელი თავდასხმა უკრაინული ჯარების პოზიციებზე“, - ნათქვამია განცხადებაში.

გენერალურმა შტაბმა, ასევე, აღნიშნა, რომ გასული 24 საათის განმავლობაში თავდაცვის ძალების საჰაერო ძალებმა დაარტყეს პერსონალის კონცენტრაციის ექვს უბანს და ოკუპანტის ორ საკონტროლო პუნქტს, ხოლო სარაკეტო ძალების ქვედანაყოფებმა დამპყრობლის პერსონალის კონცენტრაციის ერთ უბანს დაარტყეს.