ბრძოლა ქალაქ ჩასივ-იარისთვის, რომელიც მდებარეობს ბახმუტის დასავლეთით, პიკს აღწევს, - ამის შესახებ უკრაინის შეიარაღებული ძალების 80-ე ცალკეული საჰაერო-სადესანტო თავდასხმის ბრიგადის სპიკერმა რომან გასკომ განაცხადა.

„სიტუაცია კვლავ საკმაოდ დაძაბული და რთულია. მოწინააღმდეგეს არ შეუწყვეტია ქალაქის აღების მცდელობები. შესაბამისად, ჩასივ-იარისთვის ბრძოლა მიმდინარეობს. ყოველდღე არის შეტაკებები, ახალი მცდელობები, კონტრშეტევები. ბრძოლა გრძელდება და ის, ალბათ, პიკზეა“, - აღნიშნა გასკომ.

მისი თქმით, საომარი მოქმედებების ინტენსივობა საკმაოდ მაღალია. დაღმავალი ტენდენციები ჯერ არ არის, რადგან ოკუპანტს აქვს საკმარისი რაოდენობის საარტილერიო საბრძოლო მასალა, პერსონალი და გარკვეულ უპირატესობას გრძნობს ზოგიერთ კომპონენტში. დამპყრობელს გადაწყვეტილი აქვს გააგრძელოს ქალაქის შტურმი.

ამასთან, საჰაერო-სადესანტო თავდასხმის ბრიგადის სპიკერი ამბობს, რომ დონეცკის რეგიონში ვითარება ადვილი არ არის, რადგან რეგიონის სრული ოკუპაცია ოკუპანტების ერთ-ერთი პრიორიტეტული ამოცანაა.