მამარდაშვილმა კარი გადაარჩინა, ეს მისი დამსახურებაა - „ვალენსიას“ ფეხბურთელი
„ვალენსიას“ მცველმა დიმიტრი ფულკიემ გუნდის წარმატებაში ქართველი მეკარის გიორგი მამარდაშვილის დამსახურებაზე ისაუბრა. „ვალენსიას“ მცველის განცხადებას ესპანური მედია აქვეყნებს.
მედიის ცნობით, „ვალენსია“ რომ ლა ლიგის სატურნირო ცხრილში მე-7 პოზიციაზეა და ევროსაგზურისთვის იბრძვის, ამაში ძალიან დიდი წვლილი გიორგი მამარდაშვილს მიუძღვის.
„12 უგოლო მატჩი სეზონში საკმაოდ ბევრია და ეს არის შედეგი როგორც მთლიანად გუნდის მუშაობის, ისე მამარდაშვილის ინდივიდუალური თამაშის, ასევე - გამართლების. თუმცა, როდესაც ბევრს შრომობ, გამართლებაც თავისთავად მოდის. ასე უნდა გავაგრძელოთ და არ დავკარგოთ თავდაჯერება, შევინარჩუნოთ განწყობა და ეს მოგვიტანს ქულებს.
რაც შეეხება „ოსასუნასთან“ პენალტს, ვნახე გამეორება. ჩემი აზრით, მამარდაშვილმა კარი გადაარჩინა, ეს მისი დამსახურებაა“, - აცხადებს ფულკიე.
