1711635342
სპორტი
„ნაპოლი“ ხვიჩა კვარაცხელიას ტრავმასთან დაკავშირებით ახალ ინფორმაციას ავრცელებს
ევრო 2024-ის პლეი-ოფის ფინალში, საბერძნეთის წინააღმდეგ საქართველოს ეროვნული ნაკრების ისტორიული გამარჯვების შემდეგ, „ნაპოლის“ ვარსკვლავი ხვიჩა კვარაცხელია იტალიაში დაბრუნდა, სადაც სამედიცინო შემოწმება ჩაუტარდა.
როგორც აღმოჩნდა, დინამო არენაზე მიღებული ტრავმა, რომლის გამოც „კვარას“ ნაადრევად მოუხდა მოედნის დატოვება, საყურადღებოა. ნაპოლის ოფიციალურ ვებგვერდზე გამოქვეყნებული ინფორმაციის თანახმად, 23 წლის ქართველს მარცხენა ბარძაყის მომზიდველი კუნთის ძლიერი კონტრაქტურა დაუდგინდა.
„თერაპიის კურსი ჩაუტარდა და სატრენაჟორო დარბაზში ვარჯიშობს“, - ნათქვამია ინფორმაციაში.
შეგახსენებთ, „ნაპოლი“ მომდევნო მატჩს სერია A-ს ფარგლებში, „ატალანტას“ წინააღმდეგ 30 მარტს ჩაატარებს. დიდი ალბათობით, ხვიჩა კვარაცხელიას ამ შეხვედრაში ვერ ვიხილავთ.
