დეოლიგარქიზაციის კანონი არის თავიდან ბოლომდე იმისთვის, რომ ისევ და ისევ ოპონენტების წინააღმდეგ გამოიყენონ, - ამის შესახებ „სტრატეგია აღმაშენებლის” ლიდერმა გიორგი ვაშაძემ განაცხადა.

მისი თქმით, ეს კანონი გამოყენებული იქნება მედიის მფლობელებისა და პოლიტიკური პარტიების წინააღმდეგ და არ მოემსახურება რეალურ მიზანს.

„ეს კანონი იმისთვისაა, რომ მედია მესაკუთრეების წინააღმდეგ გამოიყენონ, პოლიტიკური პარტიების წევრების წინააღმდეგ გამოიყენონ და არც ერთ შემთხვევაში იმ რეალურ მიზანს არ ემსახურება, რომელიც ამ დეოლიგარქიზაციის პუნქტს აქვს, რომ განთავისუფლდეს ბიძინას და მსგავსი ადამიანების გავლენისგან ეს ქვეყანა. ამიტომ, კიდევ ერთხელ ვამბობ, რომ როგორც რუსული კანონი იყო იმისთვის, რომ სამოქალაქო სექტორზე შეტევა განეხორციელებინათ, ასევე რუსული დეოლიგარქიზაციის კანონი არის იმისთვის, რომ ოპონენტებზე, მედიაზე და ყველა მათ მიერ არაკონტროლირებად ფინანსური რესურსის მქონე ადამიანებზე დააწესონ კონკრეტული შეზღუდვები და პირდაპირი შეტევა განახორციელონ. ამიტომ, აქ გვჭირდება ჩვენ ისეთივე ერთიანობა, როგორც გვქონდა რუსულ კანონთან დაკავშირებით“, - განაცხადა ვაშაძემ.