ერთი წელია მსოფლიო კორონავირუსის პანდემიას ებრძვის. ვირუსმა 1 726 822 ადამიანის სიცოცხლე უკვე შეიწირა. ათეულობით მილიონი კი დაავადებულია.
მსოფლიოს წამყვანი მეცნიერები და ინფექციონისტები დიდი ხანია შეთანხმდნენ, რომ კორონავირუსისგან თავის დაღწევის ერთადერთი საშუალება ვაქცინაა.
საბედნიეროდ მედიკოსებმა მოკლე დროში რამდენიმე ვაქცინის შექმნა შეძლეს და მსოფლიოში უამრავი ადამიანი ვაქცინაციის პროცესს იმედით შეჰყურებს.

თუმცა, მიუხედავად უზარმაზარი საფრთხისა, რაც ვირუსს თან ახლავს, არიან ადამიანები, ვინც კორონავირუსის ვაქცინის წინააღმდეგ დეზინფორმაციას ავრცელებენ და საზოგადოებაში უნდობლობას აჩენენ. ბოლო დროს რუსულ საიტებზე ახალი დეზინფორმაცია გამოჩნდა. ონლაინ მედიაში და სოციალურ ქსელებში წერენ, რომ ბრიტანეთში შექმნილი ვაქცინა ე.წ. მანათობელ ცილას, სახელად “ლუციფერაზას” შეიცავს.

ინფორმაციის გადასამოწმებლად “პრაიმტაიმი” ალერგოლოგ-იმინოლოგ ბიძინა კულუმბეგოვს დაუკავშირდა. კულუმბეგოვი ჩვენთან საუბრისას გავრცელებულ დეზინფორმაციას ანტივაქცინური მოძრაობის გაძლიერებას უკავშირებს.

მისივე თქმით, ინფორმაცია სრული სიცრუეა და ადამიანებში ვაქცინისადმი უნდობლობის გაჩენას ემსახურება.

“არასერიოზული ამბავია, ეს არის სრული სიცრუე, რომელიც ემსახურება ანტივაქცინური მოძრაობის გაძლიერებას, რათა ადამიანებს უნდობლობა გაუჩინონ ვაქცინების მიმართ, რაც შეიძლება მეტი ადამიანი რომ შეიწიროს კორონავირუსმა. ეს არის მიმართული ადამიანის დაღუპვისკენ, რადგან უნდობლობა ვაქცინისადმი ნიშნავს გარდაცვლილი ადამიანების ძალიან დიდ არმიას, ამას არ დაუჯეროთ, ვაქცინა თუ შემოვა ჩვენს ქვეყანაში, ღმერთმა ქნას ეს მალე მოხდეს, პირველი გავიკეთებ მე და ყველას გირჩევთ.”, – განაცხადა კულუმბეგოვმა “პრაიმტაიმთან” საუბრისას.


საზოგადოებაში ეჭვების გასაფანტად, ჩვენ კულუმბეგოვს ბრიტანული ვაქცინის რეალური შემადგენლობის შესახებაც ვკითხეთ:


“”ფაიზერის” ვაქცინა შეიცავს, გარდა ვირუსის რნმ ნიმუშისა, პოლიეთილენგლიკოლს, ქოლესტეროლს, კალიუმის ქლორიდს, საქაროზას,ანუ შაქარს და მონობაზისურ ნატრიუმის ფოსფატს, აი ესაა მისი შემადგენლობა და არავითარი ლუციფერი მასში არაა და ესაა რუსული აფერისტობა სრული. მოდერნას ვაქცინა შეიცავს მესენჯერულ რნმ-ს, ანუ სადაც ჩაწერილია ვირუსის ცილის შესახებ ინფორმაცია, პოლიეთილენგლიკოლი, ქოლესტეროლი, ფაიზერისგან განსხვავებით ამაში შედის ტრომეტამინი, საქაროზა და ნატრიუმის აცეტატი”, – განაცხადა კულუმბეგოვმა.

primetime.ge