ქართველი შეფმზარეულების გუნდი ერიკ სარკისიანის ხელმძღვანელობით და საქართველოს გასტრონომიის ასოციაციის ორგანიზებით, პირველად მონაწილეობს საერთაშორისო გასტრონომიულ კონკურსში Bocuse d’or.

ახლახან მსოფლიოს ცნობილი შეფებისგან შემდგარმა ჟიურიმ ქართველების მიერ მომზადებული ერთ-ერთი კერძი დააგემოვნა. როგორც ორგანიზატორები იწყებიან:

„ლანგრის კონცეფციის შთაგონება ქართული არქიტექტური ფენომენი – მესხური ოდაა, ეროვნული კულტურული მემკვიდრეობის ძეგლი, რომელიც განსაკუთრებულ შინაარსს ატარებს – ეს უძველესი, უნიკალური ხის ჭერის კონსტრუქცია რაღაცით ჩიტის ბუდეს გვახსენებს და ქართული სამზარეულოს, ხელგაშლილობისა და სტუმართმოყვარეობის მთავარ სულისკვეთებას გამოხატავს – ერთ ჭერქვეშ გააერთიანოს სხვადასხვა ეროვნების ადამიანები.

ამ კონცეფციას ავითარებს ლანგრის სკულპტორის, ნიკოლო მელივას იდეა, რომელმაც წინაპართა სულები, მათი ეთერული სხეულების ხელები, მზის სხივებსა და ქართული კულტურის ნათებას დაუკავშირა.

საქართველო ღვინის აკვანია. ქვევრში ღვინის დაყენების უძველეს ტრადიციას 8000 წლიანი უწყვეტი ისტორია აქვს. (ქვევრი – ავთენტური ქართული, მიწაში ჩამარხული თიხის ჭურჭელია და დღესაც გამოიყენება ღვინის ფერმენტაციის, დაძველებისა და შენახვისთვის).

ეს ფაქტი ოფიციალურად დაადასტურა იუნესკომ და ქვევრის ღვინის დაყენების ქართულ ტრადიციულ მეთოდს არამატერიალური კულტურული მემკვიდრეობის ძეგლის სტატუსი მიანიჭა. ღვინო საკრალური მნიშვნელობისაა ქართული გასტრონომიისთვის.

*მზე – ნაყოფიერების ქართული სიმბოლო, შემოდგომის რთველის ყველაზე მთავარი ობიექტი, რაც, აგრეთვე, სიმბოლურია ნაყოფიერებასა და ღვინოსთან დაკავშირებული უძველესი ქართული ლეგენდებისა და რიტუალებისთვის.

ქართული მიწის ნაყოფიერება და აგროკულტურის უძველესი ტრადიცია პროდუქტების გასაოცარ მრავაფეროვნებას გვაძლევს, რაც ქართულ სუფრაზეც უხვადაა გამოყენებული, ეს ფერადოვნება ჩვენც წარმოვადგინეთ გარნირებისა და სოუსების სახით, როგორიცაა, საფერავში მოხარშული ჭარხალი, ხახვის ფხალითა და ტყემლის სოუსით, კომშის ჯემში ჩადებული დამბალხაჭოს მუსი, ამოვლებული ალადასტურის გამჭვირვალე წვენში, წითელი დოლის ფქვილის ხავიწი, ერბოში მოხარშული სიმინდით, მწერის კვერცხის კრემი კვერცხის ფორმით, ქვევრის საფერავის საწებელი ლავანდით და ახალი მწვანე ტყემლის სოუსი, ასევე, გვაქვს გამომცხვარი მწყერი სვანური მარილით და აჯიკით – საქართველოს სხვადასხვა კუთხეების გემოთა საინტერესო შერწყმა“.

როგორც საქართველოს გასტრონომიული ასოციაციის დამფუძნებელი, ლევან ქოქიაშვილი აღნიშნავს, მეორე ძირითადი კერძის დაგემოვნების შემდეგ ჟიურიმ აღფრთოვანება ვერ დამალა – „დავაგვიანეთ, მარა! ბოლო თეფში მოასუფთავეს ბოლომდე!!! ვაშაა! შეფასებები არის სასწაული, მოდიან და გვილოცავენ გემოს!“

შეგახსენებთ, რომ საქართველო ასეთ დიდ კულინარიულ ფორუმზე პირველად მონაწილეობს.